به‌یل عزالیلاری

به‌یل عزالیلاری/ عزاداران بیل

بیرینجی ناغیل 3/13

0 گؤروش
یازار:‌ باشقان

بیرینجی ناغیل
(3/13)

یولچولارا ماشین تاپیلانادک، ایسلام یولون قیراغیندا داشقادا اوتوردو. سونرا آتی قامچیلایاراق لئی تکین بهیله دوغرو یوللاندى. کاتدا ایله رمضان، قارینی ماشینا گؤتوروب دویو تلیسلری اوزه رینه اوزاندیلار. قارینین  احوالی داها یاوالاشمیش، گؤزلرینین قاراسی ایتمیش و کسیک - کسیک نفس آلیردی. 
کاتدا، قارینین ماشیندایکن تاپشیرماسیندان قورخوردو. بیر تهر رمضانی ننه سیندن آییرماغا چالیشیردی. رمضان ایسه ننه سینین جانسیز، اؤلگون اللرینى الینه آلیب بوراخماق ایسته میردی. یورغون گؤزلرینی  یوخو آلمیش، قولاغلاری آغیرلاشمیشدی. نه ننه سینی گؤرور، نه یولون توز - تورپاغینی، نه ده ماشینین چئوره سیندن ائشیدیلن زینقروو سسینی دویوردو.

گون اورتالاشیر کن، دؤنرگه باشیندا، داغ یاریغینین بیر قاریش کؤلگه سینده ماشینی ساخلادیلار. کاتدا مندیلی تلیسرین اوزرینه آچدی. رمضان بیر الجه چؤره ک آراسینا بوغدا شیله سی دولدوروب، گوجه نرک ننه سینین دوداغلارینی بیر - بیریندن آییریب شیله نی تؤکدو دیش لری اوزرینه.

کاتدا دئدی: او یئیه بیلمز، اینجیتمه!

شیشگین گوزلو سوروجو گلیب کامیونون کناریندان باخاراق سوروشدون نه ییدی؟

کاتدا دئدی: «خسته دی...)

سوروجو دئدی: «هارا یا آپاریرسینیز! خسته خانایا؟»

کاتدا دئدی: «هه، بس نئیله یک؟»

سوروجو دئدی: «خسته خانالاردا باخمیر لارکی، بوراخایدینیز که راحات جاسینا قورتارئیدی...)

کاتدا ایله رمضان بیر - بیرینه باخدیلار. خسته نین نفس لری داها قیسالمیش گؤزلری ایسه توز - تورپاق آلتیندا ایتمیشدی. دوداغلارینین چور یاشیل میلچک لر قونموشدو.

کاتدا دئدی: «کشکه اؤزوموزله  بیر قورآن گتیرئیدیک

رمضان آغلایاراق دئدی: «یوخ یوخ! اؤلمه یه جک»

کاتدا دئدی: «بیلیرم، بیلیرم ...

سوروجو دئدی: «اوغلودی؟»

کاتدا مندیلی ییغاراق دئدی: «هه، اوغلودی، منیم ده اوغلوم دی»

سوروجو باشینی توولایاراق دئدی: «اوغوللار بو زمانه ده ننه نین اؤلومونو وئجه آلمیرلارکی. من اؤزومده بو اوغلان تکین دیم، ننه مین اؤلدویو اون ایلدن چوخدور آمما باشیمدان آتانمیرام

سونرا رمضانا دؤندو: «قورخوب ائلمه، هئچ زاد اولماز، اؤلمز، اؤزوم سیزیبیر خسته خانایا آپاررام، اورادا ننه نی معالجه ائلرلر، ساغالیب دورار»

رمضان قالخیب اوتوردو، هئچقیرتیسینی اوددو. گونش تزه جه آییلمیشدی. آیاغلاری آلتیندا، گئنیش بیر دره، قارا سال قایالاریلا آغیزآچمیشدی.

رمضان دئدی: « ائشیدیرسن دده؟ باخ اورادادی»

 کاتدا زینقروو سسینی ائشیتدی.

 سوروجو دئدی: «نه یی دئییرسن؟»

 رمضان دئدی: «سن ائشیتمیرسن؟ زینقیروولارین سسینی ائشیتمیرسن؟ »

سوروجو دئدی: «نه؟ زینقروو سسی؟ بو طرفلرده ائشیدیلمز، هردن چکیگگه لر یول قیراغینا جومالاشار، اودا گئجه لر، ایندی کی گون اورتاسیدی»، ماشین یوللاندیقدا چکیرگه لرینده سسی کسیلدی.

آردینی اوخو
پنجشنبه 27 دی 1397
بؤلوملر : بیرینجی ناغیل,

بیرینجی ناغیل 2/13

0 گؤروش
یازار:‌ باشقان

بیرینجی ناغیل
(2/13)

ایسلام لا کاتدا آتی بوراخمیشدیلار. آت اپسه اؤز باشینا ی.لونو گئدیردی، رمضان ننه سینین یانیندا اوزاناراق، الینی اونون باشی آلتینا قویموشدو. هردن بیر قارینی سیلکه له یرک: « ننه ننه! یاخشیسان؟» دئیه سوروشوردو.

قاری ایسه دؤشونون گیزلین آغیری - سانجیلارى آلتیندا اینله ییردی: یاخشییام ، رمضان سئوینیردی۔
کاتدا ایسه توختاقلاشیب، گئجه دن داها چوخ قالمادیغینی دوشونوردو. بیردن رمضانین ننه سینین اینپلتیسی یوکسلدى: «باشیمی قالخیز! باشیمی
قالخیز!»
رمضان ننه سینین باشینى قالدیردی، قاری بره لمیش گؤزلریله قارانلیغا و کؤوشن زیللندی.
رمضان دئدی: «نه ایستبیر سن ننه؟ نه ایستبیر سن؟»
رمضانین ننه سی دئدی: «گؤروم بو نه دی دای؟»
رمضان دئدی: «هانسی؟»
اسلام ایله کاتدا دؤنوب باخدیلار.
رمضانین ننه سی دئدی: «بوسس...»
داشقانی دایاندیردیلار. اوزاغدان زینقیروو سسی گلیردی. کاتدا دیرسه گیله : اسلامی دورتمه لدى: «ائشیدیرسن؟»
ایسلام دئدی: «زینقیروو سسیدی، قارا چیلار داغین دالیندان کؤچمکده دیلر، بو سس آباغلارینداکی قوتازلارین جیرینق - جیرینق سسی دی
کاتدا دئدی: «یوخ اِ!  قاراچیلار دئییل لر، هله اونلارین کؤچ واختینا دئییل.
ایسلام دئدی: «آهه! ... پوروسلولاردی، قولاق آس! اوغورلادیغلاری قویونلاری درهنین ایچیندن سوووشدوروب آپاریرلار»
کاتدا دئدی: «پوروسلولار های - کوی سالمازلار هئچ زامان، کؤلگه تکین گلیب، کؤلگه تگین گئدرلر»
رمضان دئدی: «من بیلیرم، پاپاخدی گلیر، اودورها..» و قارانلیغی گؤستردی. .
رمضانین ننه سی نیققانا - نیققانا دئدی: «پاپاخ دئییل ... پاپاخین ... زینقیرووو یوخدورکی ...
سس اوزاغلاشاراق کسیلدی. کاتدا قامچینی توولادی، آت یئنی دن یوللاندی، بیر قده ر یول ائله دیکده ن سونرا ایسلام دانیشیق اولسون دئیه، دئدی: «من بئله سسلردن چوخ ائشیده رم، گئجه لر یالقیز اولدوغوما چیخیب دامدا اوتوروب دینله رم، اوندا بئله سس لردن چوخ ائشیده رم»
رمضان ننه سینین بوینونو قوجاغلادی: «قورخما ننه! مشدی ایسلام بئله سس لر چوخ ائشیدیب. یولوموزدان دا آزجا قالیر، ایندیجه یئتیشه ریک یاخشیلاشارسان»
قاری زاریدی: «اؤلورم»، رمضان آغلایاراق ننه سینی داها سیخ باغرینا باسدی: «قویمارام اؤله سن، ننه! قویمارام»
ایسلام دؤنوب دئدی: «های - کوی قوپارمایین گؤره ک، ایندی یول قیراغینا چاتیب ماشین تاپاریق»
سونرا کاتدادان سوروشدو: «کاتدا. بو اوغلون نئچه یاشیندادی؟»
کاتدا دئدی: «اون ایکی یاشینی قورتاریب»
ایسلام دئدی: «ای بارک الله، هئش گؤر بو پئکه لیکده کیشیده آغلار؟ هله نولوب کی؟ نه یه آغلیرسان ؟ »
رمضان دئدی: «قورخورام ننه م اؤله»
ایسلام دئدی: «قورخما اؤلمز، بوندان باشقا، آخیر کی اؤلمه لیدی، بس اؤندا نه ائده جکسن؟ بیزیم ده ننه لریمیز اؤلوب، منیم ننه م، کاتدانین ننه سی، ائله دئییل کاتدا؟ ائله دئییل رمضانین ننه سی؟»
جاواب وئرن اولمادی. ایسلام دئدی: «شه هردن قاییدان کیمی رمضانی ائولندیرمه لیسن کاتدا! کند دولودور اَرلیک قیزلارنان، باخ ائله مشدی بابانین قیزی، توتوق - موتوق، آغلی - قیرمیزیلی، ...»، سؤزو بیتمه دی. زینقروو سسی داها یاخینلاشمیشدی. دؤردوده قولاغلارینی شئشله دیلر.(شیشله مک، سیخ کردن)
کاتدا داشقانی دایاندیردی، ایسلام دئدی: «آتاسینا لعنت عابباسین، گتیریب زینقیروولاری باغلاییب داشقانین آلتینا»
یئنیب داشقانین آلتینا گیریب هر یئرینه اَل گزدیردی، نسه زینقروولاری تاپا بیلمه دی. یئنی دن یوللاندیلار. ایسلام دئدی: «قورخمایین، هاوا ایشیغلانسا زینقروولارین یئری بلله نر»
گئتدیلر، گئتدیلر. هاوا ایشیغلانینجا زینقروولارین دا سسی کسیلدی. و یول اوزاغدان گؤروندو.

اوچونجو بؤلوم: کلیک ائلیین

آردینی اوخو
سه شنبه 25 دی 1397
بؤلوملر : بیرینجی ناغیل,

بیرینجی ناغیل 1/13

0 گؤروش
یازار:‌ باشقان

بیرینجی ناغیل

قه‌فه قوروپو
(1/13)

کاتدا ائودن چیخدیقجا ارباب ایتی پاپاخ، هورمه یه باشلاییب، باغین دوواریندان کوچه یه آتلادی. به‌یلین دام دووارلاریندا یاتمیش اولان باشقا ایتلرده باشلارینی قالدیریب گرنشدیلر. ایتلر، کاتدانی هوندور بویویلا آی ایشیغیندا گئدرک گؤردوکده یئنی دن باشلارینی بیلکلری اوزرینه قویوب یاتدیلار.
کاتدا دوروب دینلدی. کندین چؤلوندن زینقروو سسی گلیردی. کندین چئوره سینی چولغایان بو بوغونتولو دالغین سس گاه اوزاغلاشیر، گاه دا یاخین لاشیردی. بوتون پنجره لر قارانلیغییدی. به‌یل لیلر یاتمیشدیلار. اویاق اولانلاردا قارانلیغدا اوتوروب، آی ایشیغینا تاماشا ائدیردیلر.
پاپاخ، کاتدا یا یاناشاراق دایانیب ایمسیلدی (اییله‌دی) . کاتدا قولاق آسیردی زینقروو سسی اوزاغلاشدی. کاتدا گؤله دوغرو گلدیکده پاپاخ دا اونون آردینجا گلدی گؤلون قیراغینا یئتیشدیکلرینده بیر کیچیک پنجره آچیلاراق، بیر کیشی باشی ائشیکه چیخدی.
باش ترپشرک دئدی: «گئجه یاریسی دی کاتدا! هارا یا گندیرسن؟» .
کاتدا دوردو، پاپاخ دا دوردو. ایکیسیده ائشیگه چیخان باشا باخدیلار.
کاتدا دئدی: «رمضانین ننه سینین احوالی قاریشیب، شهره گؤتورمک
ایستییرم»

باشقا بیر پنجره ده آچیلدی، باشقا بیر کیشی نین باشی ائشیگه چیخاراق دئدی: «آخشام باشی یاخشییدی کی، ائله دئییل؟»
کاتدا دئدی: «آخشام باشی یاخشییدی، نسه ایندی یاخشی دئییل، ایشدی بیردن آرواد اؤلوب ائله سه نئینه پیم من؟ هن؟ آی ایسلام! نئینه ییم؟ اوغلانی نئینه ییم؟»
ایسلام دئدی: «ایندی نه ته هردی؟»
کاتدا دئدی: «یاوالاییب، ایندی اوزو قیبلایادی»
بیرینجی کیشی اییلیب ایسلاما دئدی: «شهره گؤتورمک ایستییر»
سونرا کاتدایا دؤنوب: «سحره جه ن گؤزله‌سنه؟» دئدی
کاتدا دئدی: «قورخورام سحره چکمه یه، چوخودا رمضانین فیکرینده یم  آرواد قورتاریب آرتیق، قورخورام اوشاق خؤده‌ک دن(غم درونی- آردیجیل غم) اؤز باشینا بیر ایش آجا نئینه ییم؟ هن ؟ کسیب ننه سینین یانین، وورهای یاش تؤکور، آغلیر»

ایسلام سوروشدو: «نه تهر آپاریرسان شهره؟»
کاتدا دئدی: «یول قیراغینا کیمی سنین داشقانلا یئتیریب، اورادا ماشین تاپارام»
کاتدانی دانیشیغا قیزیشمیش گؤرن پاپاخ، گؤلون قیراغیندا شؤنگویوب، بورنونو بیلکلری اوستونه قویاراق گؤزلرینی یومدو.
کاتدا بیردن چؤنرک دالینا باخدی. پاپاخدا باشینی قالدیریب قارانلیغا باخدی....
ایسلام دئدی: «نه وار؟ نه اولدو؟»
کاتدا دئدی: «ائشیدیرمیسن؟ زینقیروو سسی گلیر، گلمیر؟»
ایسلام و او بیری کیشی قولاق آسدیلار. نسه زینقیروو سسی ائشیتمه دیلر.
ایسلام دئدی: « من ده گله رم، داشقانی دا اؤزوم قایتارارام»،
باشینی ایچری چکدی. فانیسییاندیردی، پاپاغینی باشینا تاخیب، پنجره دن اشیگه گلدی.
اوبیری کیشی پنجره نی باغلادی، آروادی دا گلدی و ایکی سی بیرلیکنه پنجره دالیندا قالیب، فانیس ایشیغیندا کاتدا ایله ایسلام و پاپاخین اوزاغلاشمادا اولان آیاقلارینا تاماشا ائله دیلر
أیسلام دئدی: «پس ایش - گوجونو نئیله یه جکسن؟
کاتدا دئدی: «تاپشبریرام سنه، رمضانین دردی منی لاب کاریخدیریب، قورخورام ننه سیندن سونرا اؤز باشینا بیر ایش آچا، گؤلون اوبیری کنارینا چاتدیقدا، فانیسین ایشیغی سویا جالاندى، بالیقلار سویون کنارینا گلیب کیشیلره باخدیلار.
پاپاخ ایپلیب بالیقلارا باخدی، گؤزو گولون اورتاسیندا کی آیا ساتاشان کیمی هورکویوب کیشیلرین آردینجا قاچدی
کاتدا دئدی: «رمضانی دا اؤزومله آپارمالیام، یوخسا آپارماسام....
آددیملارینین سسی کوچه ده دولاشدی، به‌یل لیلر فانیسی گؤرونجه رمضانین ننه سینی قورتارمیش سانیب، پنجره لردن ائشیگه تؤکولوشدولر.
قوجالاردا ائشیگه گله بیلمه دیکلرینه گؤره دام - باجالاردان بویلاشدیلار.
داشقانی سهمانلاییب گتیردیلر. هامی دینمه‌ز - سؤیله مز دورموشدو.
رمضانین ننه سبنی ایسلام ایله مشدی جاببار، عابباس و قیرمیزی تئل یورغان آراسیندا گتیریب داشقایا اوزاتدیلار. 
ایسه سئوینجک، جیلیتقاسینی دویمه له یرک، قاچا ۔ قاچا گلیب چیخدی داشقایا و ننه سینین یانیندا اوتوردو.

ننه خانیم ایله فاطما ننه توربه سویولا داشقایا دوغرو گلدیلر. ننه خانیم رمضانین ننه سینین آغیزینی آچدی، فاطما ننه بیر قاشیق توربه سویوندان قارینین بوغازینا دامیزدیردی، آغا یئکه عمامه سیله داشقانین اوبیری طرفینده دوروب ایتی - ایتی دوعا اوخویوردو
اسلام ایله کاتدا سوروجو یئرینده اوتوروب، چوبوغلارینین سازلادیلار
به‌یل لیلر داشقا ایله یاناشی گؤلون قیراغینادک گلیب، دوردولار
رمضان دؤنوب اونلارا باخدی. به‌یل لیلر دینمز دایانیب و دیل آلتیجا اونلاری دوعا ائتدیردیلر.
کنددن باییرا چیخدیقدا یول ایشیغیدی. پاپاخ یوز آددیمجا اونلارین آردینجا قاچیب، بیردن گئری قاییتدی. گلیب آغاجلارین آلتیندا گیزلنرک داشقایا زیللندی.
اوزاغدان زینقیروو سسی گلیردی. اونلار یول گئدرکن آی ایسه آشاغا ائنمکده ایدی. آی ائنیب ائنیب ایریلندی. رمضان دؤنوب گئری باخدی. به‌یل سانکی اللرینی گؤیه قالدیرمیش، اونلاری دوعا ائتمکده‎‌یدی.

ایکینچی بؤلوم: کلیک ائلیین

آردینی اوخو
سه شنبه 25 دی 1397
بؤلوملر : بیرینجی ناغیل,